DEI SOM REISTE

Utflytta frå Hovin i Telemark

1870-1879

Utvandra til Amerika i 1870

Menn: 5
Kvinner: 8
Barn: 7

Utvandra til Amerika i 1871

Menn: 3
Kvinner: 3
Barn: 1

Utvandra til Amerika i 1872

Menn: 1
Kvinner: 1
Barn: 5

Utvandra til Amerika i 1873

Menn: 3
Kvinner: 5
Barn: 5

Utvandra til Amerika i 1876

Menn: 2
Kvinner: 2
Barn: 7

Utvandra til Amerika i 1878

Menn: 1
Kvinner: 1
Barn:

Utvandra til Amerika i 1879

Menn: 1
Kvinner: 1
Barn:

Ei økonomisk krise i Amerika omkring 1873 kan ha førd til stopp i utvandring frå Hovin og frå resten av Noreg. I åra 1874 – 1875 var det ingen som utvandra til Amerika. Unntaket var Margit Gjermundsdotter Sønstegard som var født i Hovin, men som utvandra frå Tinn i 1875. Frå 1876 byrja utvandringa så smått å ta seg opp igjen.

Dette er dei som reiste:

1870 - Ole Hansen og Ingebjør Hansdtr. Rustaden med 2 barn

Utvandra til Amerika. Meldt utflytting frå Hovin 27. mars 1870.
Utflytting: Ole og Ingeborg frå Rustan.

Ole hadde foreldre som hadde reist til Houston, Minnesota. Ingeborg hadde ei syster i Wisconsin. Oles syster Anne Hansdotter som hadde blitt enke i 1869 reiste også saman med Ole og Ingeborg no.
Med seg hadde dei barna: Hans 5 år, Gro 2 år.
Dei reiste med barken «Rjukan» frå Skien 12. april som kom til Quebec 3. juni 1870.
Eg har ikkje funne familien etter at dei kom til Quebec.

1870 - Anne Hansdatter Midgaarden med 1 barn

Utvandra til Amerika. Meldt utflytting frå Hovin 27. mars 1870.
Utflytting: Anne og dottera Ingeborg.

Anne var enke etter Herbjørn Halvorsson Midtgarden. Han døde i desember 1869. Anne reiste no med dottera Ingeborg 4 år. Annes bror, Ole Hansson og familien hans, reiste samtidig. (sjå over). Svigerinna Gro Halvorsdotter, Herbjørn Halvorssons syster, var med i same reisefølge.
Dei reiste med barken «Rjukan» frå Skien 12. april som kom til Quebec 3. juni 1870.
Eg har ikkje funne Anne og dottera i Amerika.

1870 - Gro Halvorsdtr. Midgaarden - 31 år

Utvandra til Amerika. Meldt utflytting frå Hovin 27. mars 1870.
Utflytting: Gro Halvorsdotter.

Gro reiste saman med svigerinna Anne Halvorsdotter. Ho reiste med barken «Rjukan» frå Skien 12. april som kom til Quebec 3. juni 1870. Eg har ikkje funne Gro i Amerika.

1870 - Ole Torgersen og Birgith Olsdtr. Bredseth

Utvandra til Amerika. Meldt utflytting frå Hovin 28. mars 1870.
Utflytting: Ole og Birgit.

Ole Torgeirsson Ullern og Birgit Olsdotter Tveito gifta seg dagen før dei meldt utflytting for å reise til Amerika.
Dei kom nok fyrst til Houston County, Minnesota. Dei fekk truleg ni barn, dei fleste vart født i Fillmore County i Minnesota.
Ved folketeljinga i 1895 budde Birgit og barna i Norway Township, Fillmore, Minnesota. Ole er truleg død omkring 1895, for han er ikkje nemd i folketeljinga. I 1900 bur dei framleis i Norway Township. Då er Birgit oppførd som enke.
Birgit døde i 1931 i Hangaard Township, Clearwater County, Minnesota. Truleg hjå sonen John.

1870 - Gunhild Gjermundsdtr - 19 år

Utvandra til Amerika. Meldt utflytting frå Hovin 28. mars 1870.
Utflytting: Gunhild Gjermundsdotter.

Gunhild var dotter til Gjermund Ørstensson og Susanne Gunnulfsdotter Øverbakke. Eg har ikkje funne Gunhild etter at ho meldte utflytting frå Hovin.

1870 - Torger Torgersen Bakka - 18 år

Utvandra til Amerika. Meldt utflytting 4. april 1870.
Utflytting: Torgeir Torgeirsson.

Torgeir var ungkar og reiste no saman med broren Ole og kona hans. I Torgeirs nekrolog står det at han kom saman med foreldra og at dei fyrst busette seg i Decorah, Iowa. Torgeirs mor døde i 1856 i Hovin, men faren, Torgeir Olsson, kan kanskje ha reist utan å melde utflytting frå Hovin. Torgeir og faren budde i Holte ved folketeljinga i 1865.

Torgeir gifta seg med Gunhild Gunleiksdotter Høyset. Ho hadde kome til Amerika i 1869. Dei fekk mange barn.
Gunhild døde i Fillmore County, Minnesota i 1936. Torgeir døde same stad i 1945.

1870 - Kittel Østensen Veaasen og Birgith Olsdtr. Høiseth

Utvandra til Amerika. Meldt utflytting 9. mai 1870.
Utflytting: Kittil og Birgit.

Kittil var frå Veåsen som på den tida tilhøyrde Atrå prestegjeld. Kittil og Birgit gifta seg 9. april i Hovin kyrkje, ein månad før dei meldte utflytting for å reise til Amerika. Birgit hadde ei syster som hadde utvandra til Amerika i 1861.
Birgit og Kittil kom truleg fyrst til Harmony i Fillmore, Minnesota. Eldste dottera, Aslaug, vart født der.
I 1880 budde dei i Elbow Lake, Grant, Minnesota. Der finn vi også familien i 1895. Dei fekk mange barn og stor etterslekt. Kittil døde i 1899. Birgit døde nesten 30 år seinare, i 1927. Då budde ho i Nord Dakota, kanskje hjå dottera Ella (Aslaug).

1870 - Knud Kittelsen og Guro Brynildsdtr i Olesrud med 4 barn.

Utvandra til Amerika. Meldt utflytting frå Hovin 21. mai 1870.
Utflytting: Knut og Guro.

I fylje Hovinsoga kom Knut frå Lisland i Busnes, født i 1833, og Guro frå Vålundkåse i Tinn, født i 1837.
Dei gifta seg i Hovin og alle barna er døpt i Hovin kyrkje. Kittil i 1862, Gjertrud i 1864, Brynild i 1866 og Sigrid i 1869. Då dei meldte utflytting frå Hovin hadde dei budd nokre år i Olesrud.

Familien kom til Trempealeu, Wisconsin. Dei fekk fleire barn til etter at dei kom til Amerika. I FamilySearch finn vi eit slektstre.

1870 - Anne Ambrosdtr. Dalen - 27 år

Utvandra til Amerika. Meldt utflytting frå Hovin 17. juni 1870.
Utflytting: Anne Ambrosdotter.

Annes bror, Halvor, reiste til Amerika i 1868. Eg har ikkje funne nokon av dei i Amerika.

1871 - Gunnuf Kittelsen Kaase - 49 år

Utflytta til Tinn. Meldt utflytting frå Hovin 11. mars 1871.
Utflytting: Gunnulf frå Stegarud.

Gunnulf kjøpte Slettomdalen som ligg eit par kilometer aust for Veåsen. Slettomdalen, også kalla Slettungdalen, tilhøyrde då Tinn. Han døde der i 1881. Han vart ikkje gift.

1871 - Gunhild Kittelsdtr. Jore - 10 år

Utvandra til Amerika. Meldt utflytting 3. april 1871.
Utflytting: Gunnhild Kittilsdotter.

Gunhild som vart sendt aleine til Amerika, 10 år gamal.
Gunhild og systrene hennar, Ingeborg og Anne, vart foreldrelause i januar 1866 då begge foreldra døde av nervefeber med to vekers mellomrom.
Systrene vart skilde og sett bort på legd til forskjellige plassar i bygda. Ingeborg var 8 år, Gunhild var 5 år og Anne var knapt 2 år. Ingeborg og Anne vart værande i bygda. Dei var ugifte og gjekk i teneste. Dei er på ein ny gard ved kvar folketeljing.

For Gunhild vart det annleis. Då ho var 10 år vart ho sendt til Amerika, aleine kan det sjå ut til. Ho kan truleg ikkje har blitt sendt den lange vegen utan at nokon tok hand om ho på vegen, men eg har ikkje funne kven det skulle ha vore.
Eg har leita blant dei som kunne være i slekt, og som hadde reist til Amerika før. Om det var nokon som kunne tenkast å ville ta til seg ei foreldrelaus jente? Jentenes farsyster, Judith Østensdotter, hadde reist til Amerika i 1860, men eg finn ikkje Gunhild der, og heller ikkje nokon annan plass enno.

1871 - Hans Helliksen Skaare - 29 år

Utvandra til Amerika. Meldt utflytting 29.april 1871.
Utflytting: Hans Helliksson.

Hans var født i 1843 på Rabben, sud-aust for Gjuvsjå. Han var døpt i Atrå, og hadde ikkje flytta til Hovin som eg kan sjå. (Tinn og Hovin var same prestegjeld på den tida) Foreldra hans var Hellek Johnsen Rabben og Tone Tojusdotter Kopsland frå Gransherad. Då han reiste frå Hovin for å emigrere til Amerika budde han på Skåre under Hovinbøle.
Systera hans og familien hennar emigrerte til Amerika i 1880.
Eg har til no ikkje funne noko om Hans i Amerika.

1871 - Anne Herbjørnsdtr. Hovindbøle - 36 år

Utvandra til Amerika. Meldt utflytting frå Hovin 29. april 1871.
Utflytting: Anne Herbjørnsdotter.

Anne var ugift og 36 år gamal då ho reiste til Amerika. Annes sysken, Søvei og Hans, hadde tidlegare reist til Amerika. Eg har ikkje funne Anne etter at ho meldt utflytting frå Hovin. Hovinsoga fortel at ho vart gift med ein Hedmarking.

1871 - Herbjørn Gunnufsen Hovindbøle - 24 år

Utvandra til Amerika. Meldt utflytting frå Hovin 29. april 1871.
Utflytting: Herbjørn Gunnulfsson.

I fylje Hovinsoga skulle Herbjørn ha gifta seg den 3. gongen med Anne Jonsdotter frå Rue Mellom. Ho var født i 1880 og emigrerte i 1903. Eg har funne ei Landopptegning i La Crosse, Wisconsin frå hausten 1872, men den er «Canceled». Hovinsoga seier også at Herbjørns syster Margit (f. 1850) reiste saman med han, men ho reiste ikkje før i 1873. Reisemål oppgjev ho da å være Lake City, Minnesota.
Andre opplysninger om Herbjørn og dei tre konene hans har eg ikkje greid å finne.

1871 - Turi Hansdtr. Græsdalen - 28 år

Utvandra til Amerika. Meldt utflytting 29. april 1871.
Utflytting: Turi Hansdotter.

Systrene Turi og Aslaug reiste saman til Amerika. Eg har funne at Turi døde i 1894, men det er ingen kjelder til den opplysninga.

1871 - Aslaug Hansdtr. Græsdal - 25 år

Utvandra til Amerika. Meldt utflytting 29. april 1871.
Utflytting: Aslaug Hansdotter.

Aslaug reiste til Amerika i lag med syster si, Turi. Aslaug gifta seg med Leif Christensen Landsverk frå Lisleherad tre år etter at ho kom til Amerika. De busette seg nokså tidleg i Yellow Medicine i Minnesota. Det ser ut til at dei fekk fire eller fem barn. Aslaug som kalla seg Alice, blei enke tidleg. Ho døde, truleg hjå dottera si Anna Oline, i Yellow Medicine i 1938.

1871 - Halvor Gjerm. Sønstegaard - 28 år

Utflytta til Avaldsnes, Rogaland. Meldt utflytting 24. juli 1871.
Utflytting: Halvor Gjermundsson Sønstegard.

Halvor reiste til Avaldsnes på Karmøy, truleg for å arbeide på Visnes Værk. Mindre enn eit år seinare, i 1872, gifta han seg i Avaldsnes Kyrkje med Gjertine Thomasdotter. Dei fekk sonen Gjermund same året.
I 1875 reiste familien tilbake til Telemark. Dei busette seg på Stranderud i Atrå. Dei fekk sonen Thomas medan dei budde der.
I 1880 meldte Halvor, Gjertine og barna utflytting for å emigrere til Amerika. Dei fekk minst åtte barn til etter at dei kom dit. (Sjå gravminne til Halvor)
Gjertine døde i 1919 i Seattle, King, Washington og Halvor i 1922 same staden.

1871 - Anne Haagensdtr - 23 år

Utflytta til Christiania. Meldt utflytting 4. desember 1871.
Utflytting: Anne Haagensdotter.

Anne var født i Hovin 19. oktober 1848. Ho var dotter til Haagen Haagenson frå Vestfossen og Kari Olsdotter frå Kongsberg. Familien budde på Nygård under Grov i 1863 då Anne vart konfirmert.
Eg har ikkje funne noko meir om Anne i Christiania, men det kan kanskje være henne som reiser til Amerika i 1882.

1872 - Tora Alfsdtr. Græsdalen - (22 år)

Utflytta til Tinn. Meldt utflytting 12. mai 1872.
Utflytting: Tora Alfsdotter.

Tora meldte utflytting frå Hovin for å gifte seg med syskenbarnet sitt John Alfsson. Dei budde i mange år i Atrå. I 1897 meldte dei utvandring til Amerika. Ein av sønene hadde reist i 1896, og den andre fylgde forelda sine i 1897. Ved folketeljinga i 1910 budde Tora og John i Alden, Hettinger, North Dakota.
John døde i 1928 og Tora i 1930. Begge er gravlagde på Alden Cemetery

1872 - Knut Olsen Hove og dottera Thore

Knut og dottera Thore har ikkje meldt utflytting frå Hovin eller Tinn som eg kan finne.
Dei er deriomot oppførd i lista «Utvandrere fra Tinn 1837-1907» Knut Olsen og Thora Knutsdtr. som emigrert til Malta. Dei skal ha reist i 1872.

Knut gifta seg med Tora Halvorsdotter Grov i 1861. Dei budde i Midtgarden då dei fekk ei dotter den 24. juli 1865. Tore døde i barselseng same dagen. Dottera blei oppkalla etter mor si.
Etter dette har eg ingen opplysninger om Knut og dottera utover oppføring i «Utvandrere fra Tinn 1837-1907″.

1872 - Ole Kittelsen og Gunild Hansdtr. Sauro med 5 barn

Utvandra til Amerika. Meldt utflytting 29. oktober 1872.
Utflytting: Ole, Gunhild og barna.

Gunhild hadde før vore gift med Kittil Hansson Sauro som døde i 1866. Dei hadde barna Ragnhild f. 1862 og Hans f 1865. Gunhild gifta seg opp at med Ole Kittilsson frå Lonin. Dei budde på Sauro og fekk barna Gunhild f. 1868 og Ingebjørg f. 1871.
I 1872 meldte dei utflytting for å reise til Amerika i oktober. Det er seint på året for ein slik overfart over Atlanteren. Kanskje dei reiste våren etter. Eg har ikkje funne skipslister for reisa deira.

Dei fekk fleire barn etter at dei kom til Amerika. Ved folketeljinga i 1900 budde dei i Rushford, Fillmore, Minnesota. Gunhild døde i 1929 og Ole i 1931. Dei er begge gravlagde på Rushford Lutheran Cemetery.

1873 - Aslaug Olsdatter Sauro - 23 år

Utvandra til Amerika. Meldt utflytting frå Hovin 14. mai 1873.
Utflytting: Aslaug Olsdotter Sauro.

Aslaug var dotter til Ole Sveinsson og Ingeborg Halvorsdotter Sauro. Halvsystera hennar, Gunhild Hansdotter Rue, hadde reist året før, i 1872. Systera døde i Fillmore, Minnesota.
Eg har ikkje funne Aslaug etter at ho meldte utflytting frå Hovin.

1873 - Gullik Halvorsen og Aslaug Kittilsdatter Haugen med tre barn

Utvandra til Amerika. Meldt utflytting frå Hovin 14. mai 1873.
Utflytting: Gunleik, Aslaug og barna.

Gunleik og Aslaug reiste frå Hovin med barna Halvor 6 år, Kittil 4 år og Gro 2 år.
Eg trur det er Gunleik sitt gravminne i Brandt, Deuel, South Dakota. Og då truleg sonen Halvor sitt gravminne i Pierce County, North Dakota.

1873 - Gjermund Høljesen og Ingebor Høljesdatter Midgaarden med ein son

Utvandra til Amerika. Meldt utflytting frå Hovin 25. mai 1873.
Utflytting: Gjermund, Ingeborg og sonen Hølje.

Gjermund og Ingeborg reiste saman med sonen Hølje som då var 18 år gamal. Dottera Aslaug, f 1864, hadde gifta seg med Kittil Høljesson og dei reise saman med foreldra til Aslaug (sjå under).

I 1896 døde Ingeborg og vart gravlagt på Lincoln Cemetery, Ridgeway, Winneshiek, Iowa. Gjermund blei gravlagt same stad i 1912.

1873 - Kittil Høljesen og Aslaug Gjermundsdatter Jore med ei dotter

Utvandra til Amerika. Meldt utflytting frå Hovin 25. mai 1873.
Utflytting: Kittil og Aslaug.

Kittil og Aslaug reiste med dottera Margit 1 år gamal.
Aslaug var dotter til Gjermund Høljesson og Ingeborg Høljesdotter (sjå over). Ho reiste samen med foreldra sine til Amerika saman med mannen sin Kittil Høljesson frå Gransherad.
Aslaug døde i Winneshiek, Iowa i 1927. Dottera Margit finn eg ikkje noko meir om, men Kittil og Aslaug fekk fleire barn i Amerika (sjå gravminne for Aslaug)

1873 - Margit Gunnufsdatter Hovinbøle - 23 år

Utvandra til Amerika. Meldt utflytting frå Hovin 25. mai 1873.
Utflytting: Margit Gunnulfsdotter Hovinbøle.

Margits bror, Herbjørn og familien hans, hadde reist til Amerika i 1871. Eg fann ikkje noko meir om han då.

Eg har kanskje funne Margit, men det er fleire spørsmål som saknar svar her. Om det er rett Margit så må ho ha vore ugift og gravid i 7. månad då ho reiste.
I fylje United States, Census, 1880 fekk denne Margit sonen Gunoff Evenson (namn i folketeljinga 1880) i 1873. Ho vart gift med Even Evenson i 1874. Dei budde i Burnside, Trempealeau, Wisconsin og fekk mange barn. Den fyrste dottera vart kalla Ingeber Evenson i folketeljinga.
Dette må eg kome tilbake til og leite meir. Det kjem heile tida nye opplysningar.

1873 - Gunne Jonsdotter Dammen - 19 år

Utflytta til Våle. Meldt utflytting 16. juni 1873.
Utflytting: Gunne Jonsdotter.

Gunne og systera Margit meldte utflytting frå Hovin same dagen i juni 1873. Gunne reiste til Våle i Vestfold.
Der vart ho gift i 1890 med Martinius Kristian Larsson Kranstad og fekk tre barn. Gunne døde på Ramnes i Vestfold i 1934.

1873 - Margit Johnsdatter Dammen - 17 år

Utflytta til Eiker. Meldt utflytting 16. juni 1873.
Utflytting: Margit Jonsdotter.

Systrene Margit og Gunne (sjå over) reiste nok begge ut for å søke teneste. Margit meldte utflytting til Eiker i Buskerud. Ho kom til Fiskum i Øvre Eiker. Margit gifta seg i 1882 med Theodor Jensen. Dei fekk sju barn som eg har funne så langt. Margit døde på Fiskum, Øvre Eiker i 1938.

1873 - Gjermund Gjermundsen - 31 år

Utflytta til Gjerpen. Meldt utflytting frå Hovin 18. oktober 1873.
Utflytting: Gjermund Gjermundsson.

Gjermund meldte utflytting til Gjerpen, men det ser ut til at han kom til Lunde i Telemark. Han gifta seg med Anne Olsdotter Bjørndalen i 1873. Dei melde uyflytting til Gjerpen i januar 1875. Ved folketeljinga i 1875 budde dei på Borge i Gjerpen.
Etter dette har eg ikkje funne Gjermund og Anne.

1874 - Ingebjør Tovsdtr. Hovinbøle - 18 år

Utflytta til Tinn. Meldt utflytting frå Hovin 1874.
Utflytting: Ingeborg Tovsdotter.

Ingeborg meldte utflytting til Tinn for å gifte seg med Østen Jonsson Svimbil. Dei resiste sidan til Amerika i 1880. Ingeborg døde i Norway, Kittson, Minnesota i 1910.

1875 - Margit Gjermundsdr.

Utvandra til Amerika. Meldt utflytting frå Tinn 10. mai 1875.
Utflytting: Margit og familien.

Margit flytta frå Sønstegard for å gifte seg med Lars Hansson frå Atrå. Dei reiste til Amerika året etter giftermålet. Med seg hadde dei dottera Margit på 4 månader.
Dei to neste barna blei født i Minnesota. Ved folketeljinga i 1900 budde dei i Miner, South Dakota.

1876 - Birgit Johnsdtr. Dammen - 24 år

Utflytta til Eiker. Meldt utflytting 21. mars 1876.
Utflytting: Birgit Jonsdotter.

Birgit hadde nok reist ei tid før ho no meldte utflytting frå Hovin. Ved folketeljinga i 1875 var ho i teneste på Skarrud, Fiskum, Øvre Eiker. Flytteattesten måtte ho nok ha no fordi ho skulle gifte seg.
Systrene til Birgit, Margit og Gunne, hadde meldt utflytting høvesvis til Eiker og til Våle i Vestfold i 1873.

Birgit vart som sagt gift i 1876 med Olavus Nielsen Skarrud. Dei fekk ein son og budde på Fiskum, Eiker. Olavus døde tidleg og Birgit gifta seg på nytt med Anders Paulsen. Dei fekk også ein son. Birgit døde på Darbu, Buskerud i 1915.

1876 - Andres Halvorsen og Ingebjør Olsdatter Hovdestul med fire barn

Utvandra til Amerika. Meldt utflytting frå Hovin 25. april 1876.
Utflytting: Andres og Ingeborg frå Hovdestul.

Ingeborg Olsdotter var født på Hovdestul og overtok garden etter foreldra sine. I 1866 gifta ho seg med Andres Halvorsson Korperud frå Flesberg. Han skal i fylje Flebergboka ha vore staut og kjekk, men han skal ha «handla bort Hovdestul for hestar og brennevin».

Dei reiste med barna Halvor 10 år, Ole 7 år, Margit 5 år og Ingebjørg 1 år.
I 1880 held dei til i Hartland Township, Worth, Iowa, og der ser det ut til at familien blir buande. Ingeborg døde i 1896 og Andres i 1922.

1876 - Kittel Alfsen og Ingebjør Johannesdtr Græsdalen med tre barn

Utvandra til Amerika. Meldt utflytting frå Hovin 20. mai 1876.
Utflytting: Kittil og Ingebjørg Grasdalen.

Kittil og Ingebjørg reiste med barna Thora 6 år, Margit 4 år og Gunne 1 år. Etter at dei kom til Amerika ser det ut til at dei fekk minst ni barn til. Ved folketeljinga i 1900 budde dei i Rutland, Lake, South Dakota. Kittil døde i Sanborn County i 1918. Ingeborg døde i Lake County i 1934. Begge var gravlagde på Lake Madison Lutheran Cemetery, Rutland, Lake, South Dakota.

1877 - Turi Alfsdatter Øverbakke - 30 år

Utflytta til Tinn. Meldt utflytting i januar 1877.
Utflytting: Turi Alfsdotter.

Turi reiste til Tinn for å gifte seg med syskenbarnet sitt Lars Alfsson. Dei budde i Tinn nokre år før dei utvandra til Amerika i 1885. Dei reiste med barna Margit, Ole, Alf og Kittil. Reisemålet var Minnesota. Broren Kittil med familie reiste i 1876. (sjå over).
Systera til Turi, Tora Alfsdotter, og bror til Lars, John Alfsson, vart gift i 1872 og budde mange år i Atrå. Dei reiste til Amerika i 1897. Dei kom truleg til Brookings, South Dakota. (Eg er likevel litt i stuss over valget av namn, men har ikkje undersøkt det nærare.)

1878 - Ingebjør Gunnufsdtr - 26 år

Utflytta til Tinn. Meldt utflytting i 1877.
Utflytting: Ingeborg Gunnulfsdotter.

Ingeborg reiste til Tinn for å gifte seg med Hellek Olsson Bokko. Han var født på Bergerud i Sigdal, Buskerud.
Dei busette seg på Ligarden i Austbygde. I 1881 reiste dei til Amerika. Med seg hadde dei barna Ole f. 1878 og Ingeborg f. 1880.

Ved folketeljinga i 1910 budde dei i Norway, Kittson, Minnesota. Dei kalla seg Ligaard og hadde fått fleire barn.
Ingeborg døde i Kittson i 1941.

1878 - Ole Olsen Dalene - 28 år

Utvandra til Amerika. Meldt utflytting frå Hovin i mars 1878.
Utflytting: Ole Olsson.

Ole reiste til Amerika og gifta seg med Synneva Olsdatter Uhre frå Voss omkring 1882. Dei budde då i Minnesota. I 1884 hadde dei flytta til Sioux Falls, Minnehaha County, South Dakota. Dei fekk seks barn. Synneva, eller Susan som ho vart kalla i Amerika, døde i 1926.
Ole gifta seg på nytt med Martha Anderson Rein Sunding, født i Bergen. Dei fekk ein son.
Ole døde i 1926 i Sioux Falls, Minnehaha County, South Dakota.

1878 - Gro Herbjørnsdtr. Midgaarden - 34 år

Utvandra til Amerika. Meldt utflytting frå Hovin i mars 1878.
Utflytting: Gro Herbjørnsdotter.

Gro reiste til Amerika og i 1881 gifta ho seg med Knut Sørum frå Etnedal i Oppland. Dei vart gift i Caledonia, Houston, Minnesota. Dei fekk i alle fall to barn.
Gro døde i 1923 i Houston County, Minnesota.

1879 - Tov Torgersen - 24 år

Utvandra til Amerika. Meldt utflytting frå Hovin 16. juni 1879.
Utflytting: Tov Torgersen.

Tov var født i 1855 og var son til Torger Brynhildsen og Birgit Olsdotter i Vasstveitkåsa.
Han reiste til Amerika i 1879.
Eg har ikkje funne noko om Tov etter at han reise frå Hovin.

1879 - Turi Østensdr. Øverbakke - 21 år

Utvandra til Amerika. Meldt utflytting frå Hovin 1879.
Utflytting: Turi Østensdotter Øverbakke.

Turi reiste til Amerika i 1879. Presten skriv at ho hadde budd i Tinn dei to siste åra. Ho reiste saman med mange ugifte, unge utvandrarar frå Tinn.
Eg har ikkje funne Turi etter at ho meldte utflytting.

Kjelder:
Forsidebilete: Utsikt over Tinnsjøen.
Digitalarkivet.no
Hovinsoga – Gardar og Ætter.
Hovinsoga 1987. Sauro, Herbjørn K. | Rue, Ole Godtfred | Urdal, Olav H.
Tinn soga 2. Einung, H. H.
Gransheradsoga. Tjønnås, Ketil | Nisi, Aaste | Quamme, O.A.
Hitterdalsboken : gaarde og slegter. Holta, O. H.
History of the Norwegian people in America. Ole Morgan Norlie